అలిపిరి వద్ద మహావిష్ణువు విగ్రహం పడేశారంటూ భూమన ఫైర్... ఏపీ ప్రభుత్వం ఫ్యాక్ట్ చెక్ ఇదిగో!

తిరుపతి అలిపిరి వద్ద శ్రీ మహావిష్ణువు విగ్రహాన్ని నిర్లక్ష్యంగా పడేశారంటూ సోషల్ మీడియాలో జరుగుతున్న ప్రచారంలో నిజం లేదని ఆంధ్రప్రదేశ్ ప్రభుత్వ ఫ్యాక్ట్‌చెక్ విభాగం స్పష్టం చేసింది. అది అసలు విష్ణుమూర్తి విగ్రహమే కాదని, శిల్పి మధ్యలో వదిలేసిన అసంపూర్తి శనీశ్వరుడి విగ్రహమని తేల్చిచెప్పింది. భక్తుల మనోభావాలను దెబ్బతీసేలా అసత్యాలను ప్రచారం చేసే వారిపై చట్టపరమైన చర్యలు తీసుకుంటామని హెచ్చరించింది. ఈ మేరకు 'ఎక్స్' వేదికగా ఓ ప్రకటన విడుదల చేసింది.

సోషల్ మీడియాలో ఓ వీడియో విస్తృతంగా ప్రచారంలో ఉంది. ఇందులో వైసీపీ నేత భూమన కరుణాకర్ రెడ్డి మాట్లాడుతూ, అలిపిరి వద్ద ఓ అపవిత్ర ప్రదేశంలో విష్ణుమూర్తి విగ్రహాన్ని పడేశారని తీవ్ర ఆగ్రహం వ్యక్తం చేశారు. హిందూ సంస్థలు, మత పెద్దలు స్పందించి ఆ విగ్రహాన్ని ఆలయానికి తరలించాలని ఆయన పిలుపునిచ్చారు. ఈ వీడియో భక్తుల మనోభావాలను రెచ్చగొట్టే విధంగా ఉందని ఫ్యాక్ట్‌చెక్ విభాగం పేర్కొంది.

ఈ ప్రచారంపై స్పందించిన ప్రభుత్వ ఫ్యాక్ట్‌చెక్ విభాగం, అసలు వాస్తవాలను ప్రజల ముందు ఉంచింది. అలిపిరి పాత చెక్‌పోస్ట్ సమీపంలోని కార్ పార్కింగ్ వద్ద ఉన్నది మహావిష్ణువు విగ్రహం కాదని, అది శనీశ్వరుడి అసంపూర్తి రూపమని స్పష్టం చేసింది. పట్టు కన్నయ్య అనే శిల్పి సుమారు పదేళ్ల క్రితం ఈ విగ్రహాన్ని చెక్కుతుండగా, అందులో లోపం రావడంతో అక్కడే వదిలేశారని తెలిపింది. అప్పటి నుంచి ఆ విగ్రహం అక్కడే ఉందని, దానిని ఎవరూ మహావిష్ణువు విగ్రహంగా భావించలేదని వివరించింది.

ఇలాంటి నిరాధారమైన ప్రచారాలు భక్తుల మనోభావాలను దెబ్బతీయడమే కాకుండా, సమాజంలో అశాంతికి దారితీస్తాయని ప్రభుత్వం హెచ్చరించింది. తప్పుడు సమాచారాన్ని సోషల్ మీడియాలో పోస్ట్ చేయడం, ఇతరులకు షేర్ చేయడం చట్టరీత్యా నేరమని స్పష్టం చేసింది. ప్రజలు ఇలాంటి వార్తలను నమ్మవద్దని, వాస్తవాలను నిర్ధారించుకోవాలని సూచించింది.